Lekhak: Raghuveer Singh Rawat, putra swargiya Pushkar Singh Rawat, ka mool nivaas Uttarakhand ke parvatiya anchal se hai. Inka janm vidyalaya praman-patra ke anusaar 10 April 1949 ko gram Kadoi, tahsil Bhikiyasen, zila Almora, Uttarakhand mein hua.

Inke dada aur pita ji ne 1957 mein Kadoi bechkar Madanpur Baura, Post-Choi, Tahsil Ramnagar, Zila Nainital mein 52 bigha zameen kharidi thi. Tab se poora parivaar yahin rehne laga.

Inki prarambhik padhai Prathmik Pathshala Choi se hui aur 6th se 12th tak ki shiksha M.P. Inter College, Ramnagar se poori hui. BTC training 1971 mein Rudrapur se poori ki aur 1971 ke ant mein Sahayak Adhyapak ke roop mein Gopal Nagar, Maldhanchaur, Zila Nainital mein niyukti ho gayi.

Ek aadarsh shikshak ke roop mein, vibhagiya anumati ke adhar par 1974 mein private taur par B.A., K.G.K. College, Moradabad se kiya (us samay yeh college Agra University ke antargat tha). 1976 mein M.A. (Sociology) bhi K.G.K. College, Moradabad se poora kiya, tab tak yeh college Rohilkhand University ke antargat aa chuka tha.

38 varsh ki seva ke baad, 2009 mein Rajkiya Vidyalaya, Purva Madhyamik Naryipur Choi se Pradhanadhyapak pad se seva-nivritt hua.

Ab maine chaaron Vedon ka adhyayan Delhi se Gangaakar ke Hindi arth (anuvaad) ke saath kiya hai. Unmein nirakar Ishwar ki upasana, aur raja, senanayak, shikshak, yuddh, tatha janata mein nar-naari ke gunon, kartavyon aur adhikaron ka vistrit varnan milta hai.

Jab hamara dharm Vaidik dharm hai, to hum karmkandon aur bhagwan ke aakar-pooja ke upasak kaise ban gaye? Duniya ke adhikansh dharm, adivasi dharm ko chhodkar, ekeshwarwadi hain—jaise Yahudi, Isai, Muslim, aur Bauddh dharm, jo sab nirakar aur ek Ishwar ko maante hain. Ye dharm poori duniya mein phail chuke hain.

Maine apne sabhi lekhon mein Hindu dharm mein aayi kamiyaan aur buraiyon par vistar se charcha ki hai, taaki buddhiman Hindu janta unpar vichaar kare, sudhaar ke baare mein soche, aur hamara desh Bharat anya deshon se bhi aage badhe—yahi mere vichaar hain.