मी B.Pharmacy च्या अंतिम वर्षाला शिक्षण घेत आहे. शिक्षणाच्या प्रवासात, विशेषतः विद्यार्थीदशेत, मनात अनेक प्रश्न उभे ठाकतात माझ भविष्य कसे असेल? मी यशस्वी होईल का? अशा विचारांनी माझ मन अस्वस्थ व्हायचं.

या असंख्य प्रश्नांनी माझ्या मनाचे दार ठोठावले आणि त्या दरवाजातून नकारात्मकतेचा नकळतं प्रवेश झाला. ही नकारात्मकता इतकी खोलवर रूजली की आयुष्याबद्दल, स्वतःबद्दलच शंका निर्माण होऊ लागली. मी या नकारात्मकतेचा उगम शोधला तो म्हणजे “विचार”. आणि मग त्या विचारांनाच लेखणीच्या माध्यमातून उलगडत, शब्दांमध्ये रूपांतर करत, मी स्वतःसाठी एक नवा मार्ग शोधला.

लहानसहान कृतींमधून आणि सकारात्मक दृष्टिकोनातून मी नकारात्मकतेवर मात केली. या पुस्तकामधून मी वाचकांशी मनापासून संवाद साधला आहे असा संवाद, जो प्रेरणा देतो, विचारांना दिशा देतो आणि सकारात्मकतेचा दिवा तेवत ठेवत नकारात्मकतेच्या अंधाराला दूर करण्याचं बळ देतो.