"Hijaab Wali Ladki" kahani sangrah mein kul gyaarah kahaniyaan hain. Yeh pustak maanviya bhaavnaaon, samvedanaon aur samaj mein din-pratidin milne wale patro ke anubhavon ko kaagaz par utaarne ka ek vinamra prayaas hai, jo priya paathakon ko samarpit hai. Mere kahani sangrah ka pratyek patra apni alag pehchaan rakhta hai — chahe kahani "Uljhan" ki Zeenat ki manosthiti ho, ya "Fammu" kahani ka saral hriday Fammu ho, ya "Saamne Wali Khidki" ki Indu Bhabhi, jinka premamay sneha shraddha utpann karta hai. "Jhooth ki Akkhad Geeta" mein college life ka vah khauf aur jhooth bolne ki majboori ko hasya-vyangya ke roop mein vyakt kiya gaya hai. "Paraya Dhan" ek madhyam varg ki ladki ki kahani hai, jismein dikhaya gaya hai ki kaise vivaah ke turant baad hi parivaar use paraya kar deta hai. "T.T." kahani ka patra samaj ki vikriti ko pradarshit karta hai aur aise logon ke baare mein sochne par majboor karta hai. "Shraddha" kahani mein patra ka kathin sangharsh humein vipreet paristhitiyon mein bhi sahas pradan karta hai. Wahin "Chandni" ki prem katha, jo gair-mazhab ke sandarbh se judi hai aur samaj ke liye aswikar hai, hriday ko udveilit karti hai. "Saza" ki Shabana ka bemel vivaah ke khilaaf vidroh kahin na kahin man par gehra prabhav chhod jaata hai. "Hijaab Wali Ladki" kahani sangrah se mujhe aasha hai ki yah paathakon ko pasand aayega. — Lekhak Bakhtawar Hanif