Dr. Lovely Sharma (ShriLovely)

Unknown Location

"Dr. Lovely Sharma (ShriLovely) Jammu (Jammu & Kashmir) ki rehne wali hain. Unki mataji Shrimati Amar Devi ek grihini thi, aur pitaji Shri Durga Dutt Magola sarkari school ke adhyapak the. Do bhaiyon aur teen behnon mein se do behnon ne swarth ka tyag kar, avivahit rehne aur samajseva karne ka pran liya, jismein se Dr. Lovely shiksha kshetra se jude hone ke karan is niswarth path par agrasar hoti chali gayin. Yah unki maa-babuji ka hi aashirvaad tha ki har kshetra ko apne athak parishram evam bina kisi ki sahayata ke paar karte hue ve rajya evam rashtriya un manchon par pahunch kar gauravanvit hui, jahan pahunchna sabhi ka sapna hota hai। Dr. Lovely Sharma shiksha jagat ki ek varishth, samarpit evam bahuayami shikshavid hain, jinhone SCERT Jammu se sevanivritt hone ke baad bhi shiksha ke kshetra mein amoolya yogdan diya hai. Unhe varsh 2016 mein Sarvashreshth Shikshak Puraskar se sammanit kiya gaya। Shaikshanik roop se ve M.A., B.Ed. hain tatha Gandhivadi Darshan evam Shanti vishay mein PhD se alankrit hain. Sansadhan vyakti ke roop mein unhone bhasha shiksha, pathyakram vikas evam adhyayan tatha shaikshanik website ke adyatan jaise mahatvapurn karyakshetron mein vishesh bhoomika nibhayi। Apne karyakaal mein unhone anek shaikshanik karyashalaon ka samanvay, shaikshanik calendar evam pathyakram nirmaan, parikshaon ki nigrani, prashnapatra nirmaan, pathyapustak samiksha tatha Covid kaal mein grih karya aur online shikshan samagri ke vikas mein ullekhniya yogdan diya। Radio, video kakshaon, J&K BOSE ki Hindi evam Dogri pustakon (Kaksha 1 se 10) ki samiksha evam samagri nirmaan mein unki vishesh dakshata rahi hai. FLN, Bridge Course, Shiksha Parv, RTE tatha Paryavaran aur Hindi Diwas jaise aayojanon mein unki sakriya bhoomika rahi। Shiksha, samaj aur rashtra nirmaan mein unke yogdan ke liye unhe Mahila Ratna, Bharat Jyoti, Dr. A.P.J. Abdul Kalam, Rashtriya Shiksha Ratna, Nation Builder evam Paryavaran Mitra jaise anek rashtriya va rajya stariya puraskar prapt hue hain। Unke shaikshanik lekh State Times, Early Times aur Daily Excelsior jaise pratishthit samachar patron mein prakashit hue hain। Dr. Lovely Sharma ka sampoorn jeevan shiksha ke madhyam se gunvatta, navachar aur maanaviya moolyon ke prasar ko samarpit raha hai।"